الثلاثاء، 26 يوليو، 2011

المدونات عيب


اللي متابعني من زمان يعرف إن مدونتي كان اسمها مدينة الحب وأنا كنت عاشقة الحب.. بعيدًا عن كمية الحب اللي في الموضوع اللي بقيت بتكسف منها دلوقتي.. في بداية تدويني كنت معلنة عن سني في بروفايلي الخاص بالبلوجر اللي هو أول ما بدأت كان 9 سنين.
في الفترة دي من 9 لـ 10 سنين كان اللي بيدخلي لازم يسالني إنتي فعلا عندك 9 سنين؟ أو لما كملت 10 إنتي فعلا عند 10 سنين؟؟
في فترة الـ11 سنة بدأت أفكر بشكل تاني أنا ليه أساسًا أخلي اللي يدخلي يفكر بس في سني؟ ساعتها رحت شيلت سني من البروفايل وقلت خلاص بقى مفيش حاجة اسمها سن. حاليًا في مرحلة الـ12 سنة أنا إيثار أحمد اللي تعرفوها مش عاشقة الحب والكلام ده :) كدة باقيلي شهرين وأكمل 13 سنة.

أيوة عارفة إنك بتسأل فين المشكلة يعني؟؟! ما أنا هقول صبرًا
زماااان مش زمان أوي يعني لكن في فترة الـ9 سنين كنت بكتب عن التلاميذ الغلبانين وممكن تلاقيهم هنا.. "نحن التلاميذ الغلبانين"، "الغش هو الحل" وحاجات تانية يعني لكن دي نماذج. دلوقتي بعد آخر الأحداث اللي حصلت عايزة أكتب عن البشر الغلبانين لإن مش لازم أقول إني تلميذة، أنا في الآخر إنسانة عايشة بتتكلم بتكتب بتاكل بتشرب إنسانة طبيعية يعني ليا أفكاري وشخصيتي (مش فضائية.)

مرة كنت ضفت مدون على الفيس بوك، الراجل ده أثر فيا جامد يعني بعد ما ضفته بشوية راح كلمني شات من غير سلام ولا أي حاجة انت مين؟؟؟ (انت) يمكن فاكر إن إيثار اسم ولد ولا حاجة عديها.. طيب وبالنسبة لمين دي أعمل فيها إيه؟؟ قلت يمكن عنده ضعف في الذاكرة قلتله أنا إيثار وحطيت اسمايل كدة :) المهم بعد شوية كلام في ازاي إنتي بتكتبي والكلام اللي ملهوش لازمة ده.. وأنا أقوله عادي يعني الموضوع ملهوش علاقة بالسن راح قالي "لا المدونات عيب!" بعد ما كنت زعلانة وعمالة أشرحله جاتلي حالة صمت كدة.. صمت.. صمت.. فتحت في الضحك وقلت أكمل معاه للآخر أشوف آخر الافتكاسات دي إيه، وآخرتها طبعًا "ريموف" وأقوله إلى اللقاء.

اللي طلعت بيه إنه مش بيعرف يحسب و12 سنة يعني خامسة إبتدائي (يا عم روح اتعلم حساب الأول) وإن المدونات عيب، وإنه مش مصدقني، وإني مش بقول الحقيقة وغبية وكام شتيمة كدة.. وكومديا آخر حاجة.

موقف تاني: مدونة عزيزة بحبها بجد اسمها أسماء أحمد ضافتني على الفيس بردو "المشاكل كلها من الفيس والله صدقوني" كلمتني ازيك وكلام كدة وكانت بتتكلم انجلش وأنا مصرة أتكلم عربي (عربية أصيلة يعني:)) بعدين قالتلي عندك كام سنة؟ قلتلها 12.. قالتلي ايه؟؟ قلتلها 12 مع ابتسامة بردو:) قالتلي ازاي؟ قلتلها كدة..
فضلنا نتخانق ومش مصدقاني بس طبعًا هي محترمة مش زي الأخ اللي فات.. في الآخر صدقت الحمد لله وقلتلي إنها كانت فاكرة إنها أصغر مدونة بس أنا طلعت أصغر (هيييييييه) :D

موقف تالت: فاطمة الشافعي أو فاطمة عادل عشان التمويه:) من المدونين الأعزاء بردو عندها 15 سنة وفاكرة بردو إنها أصغر مدونة وطلعت أنا أصغر :))))

وبعد كمية المواقف دي رحت على جروب "كلمات" العزيز على الفيس وقلتلهم يا جماعة أنا عندي 12 سنة.. أيوة ما أنا لازم أقول من أولها بقى:)

الملخص من كل ده (ودي مجرد مواقف فيه حاجات تانية).. الملخص: إن يا إما أكون بستهبل وبكدب يا إما ألاقي حد يصدقني بس يكون كان متخيل إنه أصغر مدون عرفته البشرية.. يا إما ألاقي حد عاقل من المدونين اللي بحبهم مش فارق معاهم أصلا، اللي بجد اكتشفت إنهم نعمة كبيرة.
أنا بدون من 2008 يعني 9 سنين يعني بردو كان في أصغر مني بيدونوا ودلوقتي وأنا داخلة على الـ13 أكيد حتمًا لازم يكون في حد أصغر مني بيدون وده مش حاجة عيب يعني ولا أسطورة.

في الفترة اللي شيلت فيها سني أنا كنت معرفش إن فعلًا الناس بتفكر كدة يعني لازم أقول يا جماعة أنا عندي كذا.. طيب لو واحد عنده 70 سنة ومدون حد هيقوله يا جدي العزيز لو سمحت التدوين ده لسن معين ولازم تحطلنا تحذير في مدونتك إنك عندك 70 سنة؟؟
سؤال تاني حد دخل مدونتي هنا وميعرفش سني وحس إن اللي بتكتب دي في فرق بينها وبينه؟
طيب ليه لما يبقى مدون صغير بيكتب حلو لازم يحط في بروفايله زي فاطمة إنه سنه كذا كإنها حاجة خرافية.. أنا بحب فاطمة جدًا، وبحب كتابتها، وفعلًا شايفاها خرافية وجميلة.. لكن مش معاها في نقطة السن ليه؟ عشان بجد أنا من تعاملي مع المدونات يا إما حد هيبصلها إنها شيء عظيم جدًا يا إما إنها بتستهبل زي المدون اللي كلمني.. يمكن أنا الموضوع عندي بيختلف عشان بصدم الناس فجأة
لكن بصراحة أنا شايفة إن دي غلطتهم، غلطة المجتمع كله؛ لإن ابنك أو أخوك الصغير أو أي كائن تعرفه مجرد ما يطلق عليه لقب (صغير) خلاص يبقى مهمته في الحياة مؤجلة لحد ما يبقى راجل، وراجل دي مش لما هو يثبت إنه راجل لا لما إنت تحكم عليه بكدة على مزاجك الشخصي يعني.

وأنا كإنسانة برفض ده وبقولك مش بمزاجك.. هتقولي طيب ما بردو المجتمع بيقدملكم خدمات والأهل بياخدوا بالهم من ولادهم..
هقولك لا طبعًا مفيش أهل بياخدوا بالهم من ولادهم على الأقل في المحيط اللي أعرفه.. يعني مثلًا لما تلاقي واحد ولا واحدة من زمايلي بيرسموا أو بيكتبوا أو بيعملوا أي حاجة في الحياة ده بيبقى بناءً على رغبة الأهل؛ أنا نفسي ابني يطلع كدة فابنه بيطلع على مزاجه.. لو الشخص نفسه حابب الموضوع صدقني لا يمكن ينجح فيه لو أهله شايفين إنه أهبل وبيضيع وقته وفيه حاجات أهم المفروض يعملها من وجهة نظرهم.. ويوم ما حد يتجرأ ويعمل حاجة يبقى أسطورة ولازم يقول إنه عنده كذا وده فيه تقليل من نفسه لإنه اختصر كل حاجة في السن. اللي عايز يعرف سني يعرفه، لكن مش لازم أقول أنا عندي 12 سنة عشان حد يقولي إيه الموهبة دي.. في مدون بيقول لمدون إنت موهوب في كل بوست لما يعلق عنده؟!.. ممكن يقوله إنت جميل، إنت رائع، أنا بحبك، أنا بكرهك.. لكن موهوب دي حاجة تانية مش بتتقال إلا لأمثالنا عشان كدة قررت أشيل سني.

ولإن الموضوع فعلًا بقى بيلح عليا كتير أكتب فيه قلت لازم أكتب.. المشكلة مش في المدونين بس المشكلة في المجتمع كله.. بطلوا تحسسوا اللي أصغر منكم إنه مش موجود، وبلاش تحسسوه إنه موجود بأسلوب أنا اللي هشجعك وهعمل منك حاجة.

مش كل واحد بيعرف يرسم لازم يدخل فنون جميلة عشان هو جميل، وإنت شايف إن دي حاجة محصلتش.. مش لازم كل واحد يبكتب يبقى أسطورة واتعلم فين ودرس في مدارس ايه.. مش لازم لما آجي أبحث عن مسابقات رسم للأطفال يطلعلي رسوم متحركة
للأطفال.. ولما آجي أبحث عن مسابقات كتابة يبقى أكيد اللي هيطلعلي أدب الطفل وقصص مصورة.. مش لازم كل واحد يبقى فاكر إنه الأصغر عشان دي مش الحقيقة في أصغر مننا كلنا بكتير :))

طيب يعني عشان بردو أعرف لحد دلوقتي الأصغر بالترتيب هما: أسماء أحمد، سارة حباية بنادول، فاطمة الشافعي، إيثار أحمد ( أنا يعني) في حد أصغر مني؟! عارفة إن فيه أصغر لكن أقصد في نوع الكتابة اللي بنكتبها عشان الباقيين اللي أعرفهم بيكتبوا حاجات تانية زي تويتي اللي اسمها إيثار زيي (والموضوع ده غايظني جدًا بجد:) وفلة الجميلة :)
لو لقيتم حد أصغر بيكتب نفس الكتابة والمستوى ياريت تقولوا بسرعة عشان عايزة أعمل حزب المدونين الأحرار:D

هناك 19 تعليقًا:

  1. ههههههههه هوه فين انا من الكلام ده بقى ؟؟

    ردحذف
  2. هههههههههه
    واضح يارارا انك شايلة اوى
    ..
    رغم إنى اول ما بدأت التدوين فى نفس الوقت اللى بدأتى فيه
    قعدوا يقولولى انى اصغر مدونة
    وياه ومقولكيش
    والصراحة كنت بفرح بالكلام ده
    بس بعد فترة
    اكتشفت فعلا ان تركيزهم على السن زى ما قلتى
    ..
    أنا اللي هشجعك وهعمل منك حاجة.
    ..عندك حق اوقات بتبقى حاجة مستفزة ان حد يحسسك انه هو اللى عملك عشان شجعك حبتين وفى الواقع هو بيبقى عايز يقنع نفسه انه الاب الروحى ليكى
    وان فضله عليكى كبير
    ..
    بالمناسبة البوست مش طويل اوى يعنى ولا حاجة
    ^_^

    ردحذف
  3. صغر السن مش معناه صغر الفكر
    لا تستمعي لهؤلاء يا ايثار
    بجد كتاباتك تحفة جدا
    ومدام في هذه السن بتكتبي هذه الكتابات
    إذن فأنتِ مُبدعة وكاتبة متميزة سيكون لها شأن كبير

    ________

    خالص تقديري لفكرك وقلمك

    Casper

    ردحذف
  4. هو انا ليه اسمي مش موجود :)
    مانا لسه صغير برضه :)
    بس يا ايثار انتي فعلا عندك 12 سنة ؟:)
    ههههههههه
    طولة العمر ليكم
    وانتم الامل فيكم انكم تغيروا خريطة الادب
    بجد كتاباتك و toomy و حباية بنادول ليهم مذاق خاص وفيهم ابداع جميل جدا
    بالتوفيق ليكم ان شاء الله

    ردحذف
  5. انا اول ما دخلت مدونتك كنت بتابع فى صمت الحقيقه وكنت معجبه جداااا باللى بتكتبيه
    لكن لما شوفت بالصدفه على الفيس ان حد سألك انتى بجد عندك 13 سنه وانتى قولتى ايوه
    بصراحه انبهرت وبقول انبهرت مش اتصدمت
    انبهرت انك فى السن ده وبتكتبى حلو اوووى كده
    وقعدت افكر انى مثلا لما كنت فى سنك ماحدش ابدا كان بيشجعنى اعمل حاجه بحبها كده الا القراءه بس وماكنش فى مدونات ولا حاجه الواحد يقدر يكتب فيها زى دلوقتى
    وجه فى دماغى ان اكيد فى بنات وولاد فى سنك كتير بيكتبوا كده ووارد جدا ان اهلهم اصلا مايعرفوش بهواياتهم دى

    المشكله مش فى السن
    عشان الموهبه او القدره على فعل اى شئ مالهاش علاقه بالسن نهائى
    ليها علاقه بالعقل والتفكير
    وانتى ما شاء الله ربنا يحفظك بجد واضح جدا ان عقلك كبير

    ماتشغليش بالك بالناس المعقده اللى تقولك التدوين عيب للى فى سنك
    وماتشغليش بالك اصلا بأى حد يتكلم عن سنك
    بالعكس قولى سنك وانتى فخوره بيه لانك معنى انك بتكتبى وانتى فى السن ده يبقى انتى اكيد مشروع كاتبه هايله جداااااااااااااا فى المستقبل

    وانتى اللى هتشجعى نفسك بنفسك مش حد تانى

    ردحذف
  6. والله انتى خانقه نفسك على الفاضى

    انتى عندك 13 او عندك 80 احنا مالنا العالم كله ماله

    الاهم من كل ده انتى بتقدمى ايه

    انا رأيى المتواضع انك بتقدمى حاجات فى منتهى الجمال

    وسيبك من رأيى ورأى ناس كتير زيى

    انتى رأيك فى نفسك ده الاهم
    لمحت من كلامك ثقتك فى نفسك ودى حاجه عظيمه متخليهاش تتأثر بتفاهات

    ردحذف
  7. بطلوا تحسسوا اللي أصغر منكم إنه مش موجود، وبلاش تحسسوه إنه موجود بأسلوب أنا اللي هشجعك وهعمل منك حاجة.
    ..
    جَدعه أوووي يا إيِثار :)

    ثُم إني أنا بَقى مِش صُغيره يعني :DDD
    دَه أنا الكبيره اللي فيكو :P
    مَوضوع السِّن دَه مُستفز وممتع فـ نفس الوقت ! :DDD

    ..
    أنا أي حد هيقولي كلمه بعد كده
    هتديله البُوست ده وش كِدَه :)
    ..
    إيموشن بِيصقف كِتير بـأه :)

    ردحذف
  8. مرحبا ايثار
    انا مش حقول زيهم
    انا عايزة اقول حاجة وحدة
    انتي بتعملي ايه
    علشان نفسي بناتي يطلعوا زيك :)
    مش بقول انك حاجة خرافية أو وهمية علشان مش بتحبي الكلمات دي
    بس بجد بحترم قلمك
    وكنت بتابع بصمت
    مممممممممممم
    ايه رأيك اضيفك ع الفيس عندي
    وانا مش اكبر منك بكتير
    :)
    انا بحب تويتي وسبونج ومش بفوت حلقة منهم ع فكرة
    مش بكلمك بأسلوب انك طفلة
    لا والله
    بس بداخل كل واحد فينا طفولة بيحبها
    وانا بعشق الطفلة جوايا
    بالرغم من إني أصبحت أم
    :)
    بانتظار ردك

    ردحذف
  9. انا لما عرفت سنك انبهرت بيكي
    ودعيتلك كتيرررررررر
    ودعيت اختي تبقي زيك في يوم من الايام
    ماشاء الله عليكي حقيقي
    واللي يقول المدونات عيب يبقي جاهل
    واللي يقول التدوين بالسن يبقي متخلف
    سيري يانورماندي علي بركة الله ^_^
    انتي سكــــــرة♥

    علفكرة ..
    اختي عندها 10 سنين وعاوزاني اعملها مدونة وبتألف قصص
    بس انا اللي وحشة ومكسلة :D:D

    ردحذف
  10. كل عام وانت طيبه وبخير يا ايثار


    ۩ رمضان كريم ۩

    ردحذف
  11. بتفكريني بشبابي يابنتي ههههه اول لما دخلت ع النت كان عندي 14 سنة ولما كنت بقول لحد كدا كان زهول وحاجات غريبة ههههه
    لو الناس دي شافت كداا ياايثار اكيد هينتحروا هههههه
    ولا يهمك يابنتي خليك ف طريقك
    تحياتي لقلمك

    ردحذف
  12. لا شيء أصغر و لا أكبر منكِ و من أي شخص آخر.

    صغر السن و صورته هي مشكلة رؤية نمطية للمجتمع الذي نعيش فيه حيث يعتبر كل من له شنب أو كبير مبدع و الآخرون هواة..

    لا رجوع، إلى الأمام، إبداع، إبداع.

    ردحذف
  13. مين دا اللي بيقولك انتي صغيرة و عيب ؟
    اديله في عينه ع طول يا بنتي و ما تسكتيش :D
    أنا كنت خايبة كدا هو و مش بعرف أرد و بعدين اتعلمت أرد و أقول العبرة مش بالسن ...العبرة بالعقل !
    مالكيش دعوة بأي مشاعر سلبية (لسه راجعة من ندوة عن الطاقة الإيجابية بقه و مزاجي حلو :D) ... اهتمي بحياتك و امليها بناس إيجابية و حاولي دايمًا تفكري بإيجابية و في نص الكوب الميان ...
    بصي لنفسك في المراية و اتأكدي انك مختلفة في كل حاجة...بصمتك مختلفة بس لأنك مخلوقة لتكوني مختلفة =)
    دايمًا فكري كدا =)

    ردحذف
  14. أزال المؤلف هذا التعليق.

    ردحذف
  15. عارفة ياإيثار من 2 سنة قريت عند واحدة من المدونات بوست عن أكبر سيدة بتكتب فى المدونات كانت أفتكر أمريكية وعمرها حوالى 90 سنة لو تشوفى كمية السخرية إلى كانت مكتوبة على البوست - بعض الشخصيات عمرها ما حتتغير وحتفضل عندها ضألة فى التفكير وسلاحها الوهمى هو السفالة وقلة الأدب ولو كانوا مؤدبين حيبقى التريقة الى عمال على بطال - لا تهتزى وثقى فى قدراتك للأسف المجتمع الشرقى عنده كم من الغباء المستحكم فى مسألة السن مالهاش حل - يعنى أول ماأبتديت أكتب فى المدونة واحد بعتلى كان عاجبه أوى الى كاتبه وبعدين فى وسط الكلام سألنى عن سنى لما عرف أنى ست كبيرة أتخض ومصدقش وبعدين بطل يقرأ لى مش فاهمة هو كان بيقرأ علشان يتعرف ويتجوز ولا إيه وفيه ناس كملت معايا ولا كانت بتفرق سنى (أنا مش 70- سنة لسة فاضل لى 20 سنة عليها :))) -
    حأتبعك هنا أفضل علشان صفحة الفيس بوك مافيهاش البوست بتوعك هنا أفضل
    تحياتى

    ردحذف
  16. إحم إحم
    بصي بقه يا ستي في كلام كتير جدا ف دماغي يارب أعرف أقوله كله و يارب أعرف أرتبه :)

    عارفة موضوع " أنا مش عارف الراجل ده إزاي يقول إنه بيأكل ناس غلابة مع إني كل يوم بأكل ناس أكتر منه بس مش بقول " ؟!

    اللي هو طلع الراجل تيت لأ و إيه قال نفس اللي الراجل قاله بس اللي هو بشهامة يعني و بتاع.

    أهو إنت بالبوست ده بتعملي ده كده بالظبط اللي هو يا جماعة مش هقولكوا إن أنا "عندي 13 سنة" عشان أنا سني ميهمنيش !!

    فاهمة ؟!
    كنت ممكن توصلي المعلومة من غير ما تقولي سنك على فكرة و كان ساعتها البوست هيثبت قد إيه إنت فعلا مقتنعة بمبدأ معين !

    غير كده بقه على فكرة إن الواحد يفرح بسنه ده مش عيب خالص
    نهائيًا يعني و مش الأصغر في السن بس هما اللي بيفرحوا بيه على فكرة
    لأ الأصغر في المجال
    مثال: لو مثلا إتعين هنا ف مصر وزير عنده 40 سنة !
    أكيد هيبقه فرحان و هيموت من الفرحة لإنه أصغر وزير و لإن كفائته أهِلِته إنه يكون وزير
    و مش معنى إنه فرح إننا نقول بص الراجل الأهبل ده فرح عشان هو صغير !
    لأ طبعا هو فرحان لإن ده إحساس طبيعي
    عند كل الناس يا إيثار و لو إنت مش بتحسيه فتأكدي فعلًـا إن في حاجة غلط
    و ده أصلًـا ف علم النفس إسمه " دافع الإنجاز" إنك تجتهدي عشان تتفوقي عشان تبقي أحسن من اللي حواليكي و إسمه "الإنجاز" علشان كل واحد و حسب سرعته !
    تفتكري لو واحد عنده 30 سنة وواحد 15 وصلوا لنفس النقطة ف التفكير هيبقوا زي بعض ؟!
    أكيد لأ، أكيد في خلل ، أكيد لو هما الإتنين إخترعوا نفس الإخترع هنكرَّم اللي عنده 15 سنة !
    مع إنهم وصلوا لنفس النقطة بس هنا السرعة هي اللي حددت ف طبيعي إن كل حد فينا يفرح لما يوصل لحاجة ناس أكبر منه موصلولهاش أو وصلولها متأخر .



    "كانت بتتكلم انجلش وأنا مصرة أتكلم عربي (عربية أصيلة يعني:))"

    متهيألي م أضافتش أي حاجة للبوست !
    اللي هو إيوه يعني و بعدين ؟!!


    "بطلوا تحسسوا اللي أصغر منكم إنه مش موجود، وبلاش تحسسوه إنه موجود بأسلوب أنا اللي هشجعك وهعمل منك حاجة"

    و إنت يهمك ف إيه الناس التانية أصلًـا ؟!
    أكيد بيفرقوا بس يعني هو حد كلمك كلمتين حلوين و وااااو إنت بتعرفي تكتبي حلو هيخليكي ممتازة ولا حد قالك إنت مبتعرفيش تكتبي هيخليكي تبطلي كتابة ؟

    على فكرة مش كل حد بيشجعك بييبقه كده عشان يقول إنه الأب الروحي بتاعك و إنه هيعمل منك حاجة
    محدش بيعمل من حد حاجة يا إيثار
    إحنا كلنا حاجة بس في حاجة ليها لازمة و في حاجة ملهاش لازمة.

    يعني لو شجعنا يبقه لأ مش إنت اللي هتعمل مني حاجة ولو أحبطنا يبقه إنت متغاظ مني ، الله !!


    و لو إنت فعلًـا بتتضايقي من موضوع السن ليه عملتلي تسلسل ف الآخر بالسن ؟!!

    و ليه ف ضهر كتابك الناشر كاتب إنك لسه مكملتيش 13 و بتاع
    لو إنت فعلًـا مش مقتنعة بمبدأ السن ليه خلتيه ينشره كده ؟!
    ده كتابك يعني بيعبر عن آرائك و شخصيتك ، يعني هيفضل معاكي علطول وولادك هيشوفوه و أحفادك ليه تحطي عليه حاجة مش مقتنعة بيها ؟!!

    في إختيارين
    الأول : إنك تكوني فرحانة بموضوع إن كل حد هيمسك الكتاب هيقول واو دي لسه مكملتش 13 سنة و نشرت كتاب و ده يناقض بقه كل اللي إنت كتباه ده.
    التاني : إنك فعلًـا مش مقتنعة بس خلتيه يُنشَر كده و كده هيبقه في إزدواجية رهيبة !!

    ردحذف
  17. أه، أنا شايفه إنك مبترديش على أي حد عمل كومنت بس أتمنى إك تكوني بتقري الكومنتش :))

    ردحذف
  18. @ بسنت الصاوي

    احم احم ويلكم بيكي :)
    أنا مش برد على التعليقات إلا لو في نقطة لنقاش أو حابة أوصل حاجة، ولو مردتش على المدونة برد على صاحب التعليق في مدونته أو على الفيس أو الطريقة الي ألاقيها لكن أكيد بشوفهم، وبحفظهم ومش بيتمسحوا من الميل عندي أبدًا.. التعليقات جزء كبير من مدونتي ومدوناتنا كلنا عزيزة علينا :)

    ندخل في الموضوع بقى.. الأول أنا لما كتبت البوست ده كان مجرد فضفضة ومكنش هبتنشر أصلًا فبالتالي كلامي فيه كإني بكلم نفسي وبتالي بردو مكن بعض الجزئيات تتفهم غلط عشان الشرح فيها مش وافي


    أول نقطة.. آه فاهمة وجهة نظرك فيها تمام لكن اعتراضي بس إن أنا مقلتش أنا مخفية سني بالعكس هو موجود في بروفايل الفيس بوك من بداية السنة دي عشان مش بيقبل أقل من 13 سنة ولو كان بيبقل كنت هحطه عادي، لإن مش الهدف من إني أقول لا أنا مخفية سني، أنا قاصدة أظهره ومن البداية ترتيبي لسن الـ9 ثم، ثم.... الهدف إني أوصل الي بيقرأ البوست إن دي مش حاجة غلط مش غريبة أوي.. ما أنا مكن صح زي ما انتي قلتي كنت أوصل الفكرة من غير ما أقول سني بس ليه؟! ليه أخفيه أصلا؟

    مش عارفة أوصل النقطة دي حاليًا لأسف لكن لو في نقاش في التعليقات الجاية أكيد نتناقش فيها إن شاء الله، وممكن توصل وجهة نظري فيه من باقي الكومنت :)

    أيوة مفيش اعتراض بردو على نقطة الإنجاز.. لكن انتي فهمتيني غلط يمكن بسب الحماسة في كتابتي لبوست وصلك بالشكل ده..

    مثلًا اديكي مثال فاطمة الشافعي كلمتها بعد البوست بفترة وكان في مشكلة عندها وبنتناقش وكدة،، اللي قولتهولها "مش حاجة وحشة إن الناس تحب حاجة فيكي بس ميحبوكيش عشانها" ويمكن تبدو الجملة مبالغة بردو لكن القصد منها إن ماشي ده إنجاز (بشري مش فضائي:)) والناس مكن تحبه فيكي وحابة إنك عملتيه لكن ميبقاش هو دافع الحب (مع ملاحظة إن الحب هنا مش بمعنى الناس الي بتحبك وعارفاكي بمعنى الناس الي شايفاكي من بعيد )
    يعني الناس مش تبالغ ولا انتي تبالغي.. انتي حققتي حاجة كويسة بأكتر من مقياس تبقى حاجة كويسة بأكتر من مقياس بردو مش بمقياس واحد (اللي هو في البوست هنا السن)

    "كانت بتكلم إنجليش.........."
    البوست كله هزار وزي ما قلت في الأول فضفضة.. يعني الكلمة كانت تلقائية مش أكتر

    "بطلوا تحسسوا اللي أصغر منكم إنه مش موجود، وبلاش تحسسوه إنه موجود بأسلوب أنا اللي هشجعك وهعمل منك حاجة"
    أنا هنا مش بتكلم عن المدونات بس بتكلم بشكل عام في تحجيم وقالب معين الناس بتحطه من عندها.. لكن لو هنخليها مقتصرة على الكتابة والتدوين، أنا عندي حق لإن أنا بلاقي ناس بتعامل معايا كدة... أكيد مش هي دي الكلمة اللي هترفعني السما وتنزلني الأرض
    ومقولتش محدش يشجع ده حق لكل مواطن مصري :D أنا هنا مش بتكلم عن التشجيع، أنا بتكلم عن نقطة محددة ألا وهي الي بيسلموا نفسهم وظيفة الأب الروحي في حياتك، مش بتكلم خالص عن التشجيع يا إما هقول بقى إن كل أصحابي مش بيحبوني واخواتي كذلك وأي حد اتعلمت منه ما هو إلا شخص منافق.. وكدة أبقى معنديش تقدير لناس ولا احساس بصراحة :)

    أنا مش عاملة تسلسل بمعنى إني بحط القائمة مثلًا عادي زي ما قلت بردو ده بيندرج تحت إن البوست عفوي، وأنا حاطة الترتيب باللي أعرفهم وحتى آخر الترتيب ده قلت عايزة أعمل حزب المدونين الأحرار(هزار بردو)

    نفطة كتابي دي بقى أختلف فيها وبشدة.. أولا لإن أنا مش هقوله اكتب ايه ومتكتبش ايه هو بيقول رأيه، هو شده السن (بغض النظر انا متفقة معاه ولا لا)
    ثانيًا أنا مطلبتش أنه يحط الجزء ده، أنا كنت باعتة ليه جزء من قصة في الكتاب بعنوان "صاحب الحواس الخمس" وكان الاتفاق على كدة ولما استلمت النسخ بعد الطباعة لقيت هو ده اللي نازل على الغلاف ومكنتش عندي فكرة عنه أصلا
    وجزء ده كان أستاذ محمد مرسي (صاحب دار مير) كتبه على الفيس بوك قبل كدة وأنا كل اللي أعرفه إنه رأي نزل عن الكتاب مش أكتر

    وفي الآخر أنا عايزة بس أصحح نقطة يمكن اتفهمت غلط بردو "ليه تحطي عليه حاجة مش مقتنعة بيها ؟!!"
    المقصود هنا بحاجة مش مقتنعة بيها ايه؟
    لو أنا فهماها صح فاللي وصلي من التعليق بتاعك إنك فهمتي إني مش مقتنعة بالسن.. أنا مقتنعة بسني معنديش أي مشكلة في اظهاره معنديش مشكلة إن حد يشوفه ميزة لكن مينفعش نختصر الصورة كلها في أنا سني كذا ونقول وااو وما يتبع ذلك من حاجات :) ده اللي أنا مش مقتنعة بيه

    الحوار مفتوح أكيد
    وشرفتيني بجد.. واتمنى تقبلي إضافتي على الفيس بوك ^_^
    ثانكس جزيلًا

    ردحذف
  19. أزال المؤلف هذا التعليق.

    ردحذف

حاول أن تساعدني في إصلاح هذا العالم