الأربعاء، 24 أكتوبر، 2012

أقراط زُبيدة



__________________

..السيد النور،
لما أقف عريانة مش هخاف، هتشعلق فيك وأطير، هتمسكني، تلفني، وتمنعني من الانفلات في الهوا، هتمسكني جامد فتسيب علامات حمرا، مع الوقت هتبقى جزء مني.

العيديات واللِعَب مش في ذاكرتي عن العيد، بس أنا فاكرة مسكة إيد الراجل -اللي بيسموه في رواية أخرى بابا- لايدي واحنا ماشيين في الشوارع الفجر بندور على البهجة في العالم، كان فيه أنوار كتير وولاد عيونهم سود، أنا فاكرة الأسفلت، والفول السوداني المتغطي بعسل وسمسم، الراجل اللي ماسك ايدي داق منه واحدة، وحط واحدة كمان في ايدي.. قطمتها ثم أكلتها كلها وأنا مغمضة عيني ومش شايفة غير ضلمة ملونة.

في صباح العيد لبست جيبة بني قصيرة أوي، وبلوزة بيضا بكم وتقيلة، الدنيا كانت شتا، مش فاكرة جزمتي كان شكلها عامل ازاي.. بس احنا رُحنا نصلي في مسجد كبير حيطانه صفرا وليه عمدان طويلة.. أنا مش فاكرة الصلاة، فاكرة بس إن الحيطان كانت حلوة أوي.

عزيزي السيد النور، انت ازاي مش هنا؟ ازاي مش بتحطني في السرير وتقعد جنبي وتطبطب عليا مع بوسة على جبيني وكلام بصوت واطي في ودني "يلا نامي يا حبيبتي.. تصبحي على نور"! ازاي مش بشوف عنيك وانت بتغني؟ ولا بركز في حركة وشك ورقبتك والعلو والهبوط والنفس اللي بتاخده بين كل آية وانت بتقرا قرآن بليل؟

عزيزي أنا آسفة، أنا مش كويسة، أنا بكذب.

أنا عايزة أقراط، قلتلك عن الحلق اللي بلبسه على طول؟ ده كان بتاع جدتي، ثم بقى بتاع ماما، ثم بقى بتاع أختي الكبيرة، ثم بقى بتاعي.. عامة دي حاجة متعبة، أنا عايزة أقراط ملونة زي لون أنوار الشارع يوم العيد، زي قوس قزح، وزي نور الشمس في عنيك.

عارف.. هي قالتلي إنها مطمنة، وإننا نقدر ناخدك معانا واحنا بنلف العالم.. وأنا قلتلها دي حاجة كويسة، دي حاجة عظيمة!

هناك 6 تعليقات:

  1. حلو البوست ده
    بس انا حاسة انك حملتي السيد النور فوق طاقته

    تحياتي غاليتي

    ردحذف
  2. يارب تكونى كويسة

    و مبسوطة قوى (:

    علشان انا بعد البوست دة انا اسف مش كويس
    ):
    أصل صديقى اللى بأحكى عليه

    أصبحت بالنسبة ليه حالياً السيد نور

    برغم أن أنا سعيد بدور السيد نور فى حياته

    لكن فاكرنى البوست بزعله و أنه مش كويس

    أصل مقلش لحد كدة ... غيرى أنا -زى ما هو قالى- على ما اعتقد

    متقلقيش انا بعد الكومنت دة أحسن(:

    كل سنة و أنتِ طيبة ((:

    عيد أضحى سعيد و كُلى فول سودانى بالعسل و السمسم و غمضى عينك علشان تفتكرى الدنيا الألوان ((:

    باى

    ردحذف
  3. السيد النور حد ممكن أكون واخده عليه أكتر من أبويا و بحس معاه بحميميه أكتر من حبيبي و أقدر أطمن بيه و أستعبط عليه و أشوفه و هو مش قدامي..
    هكذا تخيلته
    جميله يا إيثار
    كل سنة و إنت بألف خير

    ردحذف
  4. "يلا نامي يا حبيبتي.. تصبحي على نور"!

    ذكرياتك مميزة ..

    أعجبنى بشدة :)
    و لكننى للأسف لم أستوعب قصدك من التعبير دا " السيد نور " ..

    ردحذف
  5. السيد نور موجود حواليكى فى كل لحظة وكل وقت
    وتقدرى تتكلمى معاه وتقوليله على كل حاجة وتحسيه بيحضنك ..

    :)

    كل سنة وانتى طيبة يا رارا
    عيدك نور ..

    ردحذف
  6. اول مرة اجى مدونتك و جيت عن طريق الصدفة البحتة بس عارف انها مش هتكون اخر مرة عشان انا استحملت اقرا البوست لغاية الاخر و عجبنى كمان .. تحياتى ليكى

    ردحذف

حاول أن تساعدني في إصلاح هذا العالم