الخميس، 4 يوليو، 2013

وأنا قلبي داب

هو حضرتك بتسمعهم فعلًا؟ لازم تسمعهم
لازم تدوب.. انت ليك قد إيه مدوبتش؟ ما انت خشب، حجر، أي زفت، المهم إنك مدوبتش ولا عمرك هتدوب
قلبك متهزش.. وأنا قلبي اتهز وارتبك لحد ما ساح وبقى عامل زي الكراميل السخن فشخ، أنا قلبي داب داب داب.. أنا قلبي داب، وانت قلبك مش بيدوب، هتقولي بظلمك هحدفك بالجزمة السودا أم شرايط وهقولك انت حمار، لو قلبك كان داب هو كمان وبقى كراميل كان زمانه التحم في الكراميل بتاعي وبقوا حاجة واحدة، مسكّرة.. مُسكرة.. من فرط الألم.
يا حمار.

بتعرف تعمل كراميل؟ حط السكر.. وقلّبه في قلب المية لحد ما يتفتت وينصهر ويفور.. عصر الليمون جدير بإنه يزيد الجرح لوعة، قلّب تاني، اسكب الكراميل على الأرضية ولاحظ البراكين والانفجارات والثورات، افتكر قلبك في لحظة فوران، الحريق، والندبات، افتكر لحظة غيرة، أو بُعد، أو قرب كاذب، الغيرة بتحرق يا اسمك إيه.. افتكر لحظة دعاء انت متأكد إنه موصلش، افتكر الشك، افتكر الظلم والقتل والانحباس الحراري.. عيط، عيط يا حجر يا اللي نمى عليك العفن، عيط وانت بتشوف الشمس بتتفجر من بين خيوط الكراميل المتماسكة.

المزيكا بتعيط.
بتعيط وانت ولا عمرك عيطت.
يا حمار يا أصولي يا متعفن.. مش لسة قايلالك إنه نمى عليك العفن؟
امشي ورا المزيكا على طراطيف صوابعك.. وانت أصلا أعصابك فالتة فغصب عنك هتلاقي نفسك بتعمل حركات متشنجة صاخبة بتفسد عظمة المزيكا الهادية.. محدش قالك إن الرقص محتاج مرونة؟ مرونة يا جبل جليد ممستهوش الشمس من يوم ما نزلت من بطن العدم.

شكّل الكراميل في ايديك على نار هادية زي ما حبيبتك كانت بتشكلك في حضنها، آه أنا عارفة إن كان عندك حبيبة في يوم ما، وكانت الحرارة الصادرة من جسمها كفيلة بتحويلك لقطعة كراميل، وعارفة إنها تاهت في الزحمة منك وفضلت تدور عليها في خطوط المترو، كل ما تمشي خطوة قلبك بيتقل خطوة.. زي الكراميل ما بيزداد سماكة على النار، وتتقل.. تتقل.. وتدور عليها، وتنادي، وتحس بحضنها بيتسرسب من جواك، بيسيب مساحة لتماثيل اسكندرية تتنحت على شفيف روحك، وتصرخ فيها، وتنادي، لكنها كانت انتهت، زي النار لما تاكل نفسها.

الاشتياق يا عديم الإحساس.. في البداية بيعمل هيصة وزيطة ومفرقعات وليلة عيد.. وفشار، بوم، بوم.. بوم بوم بوم.. وبعدين يبدأ يستكين، يتحاوط بدفا وشبع -عمره ما بيكتمل لزوم ما يفضل الاشتياق موجود- تبدأ حبات الدرة تنضج، تبدأ اللوعة الناتجة عن الاشتياق تتحول بالتدريج لحرارة ساكنة، أصيلة، بتلسع بس مبتحرقش.. فاهم؟ مهما شرحت عمرك ما هتفهم، غبي، أعملك إيه يعني!

هناك 5 تعليقات:

  1. أنا قلبي داب داب داب.. أنا قلبي داب، وانت قلبك مش بيدوب، هتقولي بظلمك هحدفك بالجزمة السودا

    http://youtu.be/gqcxmEuswHg

    الاشتياق يا عديم الإحساس.. في البداية بيعمل هيصة وزيطة ومفرقعات وليلة عيد.. وفشار، بوم، بوم.. بوم بوم بوم.. وبعدين يبدأ يستكين، يتحاوط بدفا وشبع -عمره ما بيكتمل لزوم ما يفضل الاشتياق موجود- تبدأ حبات الدرة تنضج، تبدأ اللوعة الناتجة عن الاشتياق تتحول بالتدريج لحرارة ساكنة، أصيلة، بتلسع بس مبتحرقش.. فاهم؟ مهما شرحت عمرك ما هتفهم، غبي، أعملك إيه يعني!

    هما بيفهموا ؟؟؟

    مأظنيش ): ): ):

    ردحذف
  2. عارفة ؟؟ فى ناس كدا اغبيا خلقة ربنا تشوف فوران الكراميل لؤدامهم وهما كبيرهم لو فهموا يبتسموا ايه التخلف العقلى دا ويعدين لا راجعى متعف ولا تقدمى متهبب دى ليها علاقه بتلفيف العقل والقلب الواد وقع على دماغة وهو صغير غير خابطة الكومدينوا فى حاجبة على فكرة ماتزعليش يا اثار بئا اللى فى قلبى على لسانى ههههههههههههههههه

    ردحذف
  3. هو أنا أما قريتها ماكنش عندي تعليق أقوى من : " لول " حقيقي يعني هايل خالص :) أنا حبيت الكراميل أكتر :)

    ردحذف
  4. فعليًا مش عارف أعلق ..


    بس مبسوط :)

    ردحذف
  5. عصابة النووى

    نشرت جريـدة المصرى اليوم فى 17 يوليو 2013 قال أحمد إمام، وزير الكهرباء والطاقة فى تصريحات صحفية، بعد إبلاغه بالاستمرار فى منصبه ضمن حكومة الببلاوى، إن البرنامج النووى لتوليد الكهرباء، سيكون أحد أهم محاور قطاع الكهرباء فى الفترة المقبلة.وأضاف:"لدينا برنامج جيد يستهدف إقامة 4 محطات نووية لإنتاج الطاقة،..

    الخبر واضح منه أن عصابة النووى مش ناويين يجبوها البر و كل ما يجئ رئيس يروحوا له لأقناعه بشراء مفاعلات نووية .

    لماذا نشترى مفاعل نووى تزيد تكلفته على 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط؟!!!

    بالرغم من كوارث المفاعلات النووية و أشهرها تشرنوبيل "أوكرانيا"عام 1986 و فوكوشيما "اليابان" عام 2011 مازال هناك فى مصر من المسئولين من يصر على أستغفال و أستحمار الشعب المصرى ، و يسعى جاهدا لأنشاء مفاعلات نووية لتوليد الكهرباء!!!!

    و أصبح واضحا كالشمس أن هناك عصابة منذ عهد حسنى مبارك مرورا بعهد محمد مرسى و حتى الأن تسعى جاهدة منذ سنوات لشراء مفاعلات نووية لمصر و لا يهم و لكنها صفقة العمر لأفراد العصابة من حيث عمولات بمثات الملايين من الدولارات يستطيعوا بها أن يعيشوا هم و عائلاتهم كالملوك فى أى بلد يختاروه فى العالم أما عواقب المفاعلات النووية التى سيكتوى بنارها المصريين فهذا أخر شئ يهم فاقدى الشرف والذمة و الضمير ...

    و نحن فى مصرنا نكتب منذ عام 2007 محذرين من مخاطر النووى و منبهين إلى البديل الأكثر أمانا و الأرخص

    ثقافة الهزيمة .. النووى كمان و كمان
    ثقافة الهزيمة .. العتبة الخضراء
    ثقافة الهزيمة .. أرجوك لا تعطنى هذا السرطان

    مزيـــد من التفاصيل و قراءة المقالات بالرابط التالى

    www.ouregypt.us

    ردحذف

حاول أن تساعدني في إصلاح هذا العالم